Enrico Reycend

Pitor.
Enrico Reycend a l'era nà a Turin ant ël novèmber dël 1855. Fin-a da masnà a l'avìa mostrà soa predisposission për ël dissegn e ij sò a l'han anviaralo vers cost tipo dë studi. A l'é anscrivusse al cors anferior ëd l'Academia albertin-a ëd Turin, sota la tùa d'Enrico Ghisolfi. Apress a l'é stàit anlev ëd Lorenzo Delleani e Antonio Fontanesi.

Dël 1872 a l'ha chità jë studi a l'Academia e a l'é stàit a Paris, anté ch'a frequentava ël laboratòri ëd Camille Corot. Soa përmanensa a Paris a l'ha përmetuje ëd maduré e dë spantié ij sò arferiment colturaj.

A Turin Reycend a l'avìa sò studi an contrà Vila dl'Argin-a. Prima dij vint agn a l'avìa già partissipà a j'esposission dël Sircol ëd j'artista ëd Turin, andoa a sarà present fin-a al 1920. Dal 1873 al 1927 a l'ha esponù a la Promotris dle bele art ëd Turin e a l'ha ëdcò partissipà a tre edission ëd la Bienal ëd Venessia.

Trovasse an dle dificoltà finansiarie, a l'ha chità soa ca e studi an contrà Vila dl'Argin-a e a l'ha tramudà an contrà Lagrange 29.

Enrico Reycend a l'é mòrt ai 21 ëd fërvé 1928; a l'han faje ij funeraj ant la cesa dla Màdona dj'Àngej.